Woh! Istambay, dili mangitag away.
Woh! Istambay, kalinaw among kalipay.
Sa akong pag-istambay sa siyudad sa Dumaguete...
Modukdok, mokanta, mogitara...
Motarotot aron makighigala
Sa akong paglatagaw, mokaon ug singkong lugaw.
Dili man gud ambisyoso nga mangita pa ug adobo.
Woh! Istambay, dili mangitag away.
Woh! Istambay, kalinaw among kalipay.
Woh! Istambay, sayaw aron way mahay.
Woh! Istambay, kamot ikaway-kaway.
Apan ngano ug ngano kaha
Kini ang palad ko???
Wala ba sila masayud
Sa akong kalisod???
Kinabuhing istambay
Intawon pagka-laay...
Kinabuhing istambay
dili unta magdugay...
Woh! Istambay, dili mangitag away.
Woh! Istambay, kalinaw among kalipay.
Woh! Istambay, sayaw aron way mahay.
Woh! Istambay, kamot ikaway-kaway.
Sa akong pag - istambay, ang sigarilyo nalay kalipay,
Hawid-hawiran unya dila-dilaan aron problema makalimtan.
Makainom lag gamay, ang katulog kahamugaway.
Dili na madestorbo, inigka-ugma balik sa uno.
Woh! Istambay, dili mangitag away.
Woh! Istambay, kalinaw among kalipay.
Woh! Istambay, sayaw aron way mahay.
Woh! Istambay, kamot ikaway-kaway.
- Enchi
Ako karon usa ka istambay. Usa ra akong problema apan dako kaayo kini. Dili ko nalang isugid kanimo kay basin pag ikaw makasinati ug kaguol.
(Ang kanta nga nag-ulohang Istambay, gikanta sa bandang Enchi. Sila naga-base sa Dumaguete, ug usa sila sa mga inilang mang-aawit dihang nauso ang BISROCK. Apan subo lamang nga handumon kay sila nabungkag na... )
Kay ako usa man lang ka istambay, kasarangan lang nga ang kahigayonan sa pag-laag anaa permi. Maong karong adlawa, nipatim-aw napud siya, ug iya kong gidala sa siyudad sa Dumaguete...
Una kong nakatunob sa Dumaguete niadtong nagtungha pa ako sa High School, kini nausban niadtong college na ako, ug karon mao ang ikatulo...
Sa una kong pag-anha, ang kadaghan sa mga dagkong tri-sikol mao ang akong nabantayan...Lee Plaza pa lang ang labing dakong tindahan atong panahona ug may usa ka Jollibee... Sikat na ang Nijosa... Ug akong nahibaw-an nga manirado kini sila human paniudto para sa siesta... Sa ikaduha kong anha, anaa nay Chowking...
Ug karon sa ikatulo...
Barge daw tawag ani... Diri mi sa Maayo Shipping nanakay kay nagdala man mig sakyanan...
Paghiabot namo sa dakbayan sa Dumaguete, ako nalingaw kay wala silay traffic signals... Tungod kay ako man ang drayber, naningkamot nalang nga dili maka bag-id sa dagko kaayong mga tri-sikol...
Apan bisan mao kini ang kahimtang, ang mga motorista maampingon nga nanagsubay sa kadalanan... Wala gani ko makadungog ug busina nga timailhan sa pagdali...
Human mi nangaon diri, nanglahos usa mi sa Bais City (aduna koy lain nga post mahitungod sa Bais)... Kilom-kilom na sa dihang kami nakabalik sa Dumaguete...
Suroy sa ta sa maanindot nga Robinson's Dumaguete... Daw naglunop ug mga motor sa parking area diri...
Dako kaayo ang iyang lugar nga lingin ang porma...
SALE!!! Grabe ang sale sa Robinson's... Labina sa Traveler's Club... Suya keu ko sa The North Face nga mga bags... Didto mis Trod, nya palit dayon ug Diesel Shoes...
Ang mga namaligya ug mga magpapatigayon dinhi sa Dumaguete puros mga maayo ug batasan... Maabiabihon ug andam motagana sa ilang serbisyo nga may sagol nga pahiyom...
Ang mga nagdumala pud sa parking kay dili mangayo ug bayad... Ug labaw sa tanan, matinabangon pa kaayo...
Ang mga guwardiya sa mall ug hotel mga madasigon, matinahuron ug maabi-abihon... Pagka-anindot ning lugara...
Stress Buster @ Php 45.00... Banana, pomelo, mango man siguro to ang mix ani...
Human sa kaon, nidiretso mi sa Sidlakang Negros para sa Buglasan... Grabe kadaghang taw...
Kung grabe kadaghan ang taw, ubay-ubay sab ang gidaghanon sa kapulisan nga nagbantay sa kalinaw...
Dako kaayo ang akong kadasig dihang nakita ko ang maong talan-awon sanglit talagsaon ko raman kining makit-an...
Usa pud, ang mga traffic enforcers, anaa gihapon sa kadalanan bisan paman ug hapit na tungang gabii... Hinuon, angayan lamang nga sila magpabilin kay ang kadalanan sa ilang dakbayan wala may mga traffic signals...
Tanan nga mga kalungsuran ug lalawigan sa Sidlakang Negros (Oriental Negros) adunay tagsa-tagsa ka mga luna diin sila nanagtukod ug mga balay diin nila gipakita nga mapasigarbohon sa ilang mga bahandi...
Nanag-paindigay sila sa pagbuhat niini nga daw gidala nila ang ilang tibuok lungsod ug gisulod sa usa ka lawak... May nanaghimo ug langub, mga punong, tubigan, ug mga tanaman...
Durian sa lungsod sa Valencia... Baho daw... Basin diay dili, mong atong simhuton... Dili man...
Daghan pang lungsod among nabisita... Apan ang gidugok ug taman sa mga tawo mao ang langub sa Mabinay... Paskataas sa linya niini sa gustong mosulod...
Kasagaran sa mga nanuroy sa Buglasan mga batan-on... Baleng! Panga-gwapaha ug panga-tisoya! Sama ra pud nako... lol
Aduna poy gipahigayon nga pasundayag sa ilang dakong bantawan... Sikat kaayo ang sayaw uban sa huni nga "Teach me how to dougie!!!"
Sanglit lalom-lalom naman ang kagabhion, nakadesisyon kaming mopauli na...
Padulong mi sa layong giparkingan sa sakyanan, nakaagi mi aning kan-anan... Wala mi nangaon diri kay kuyaw kaayo ug ngalan...
Kun nagbaha ang taw sa Buglasan, naglunop ang taw sa Hayahay...
Daghan man diayng manginginom dinhi... Kasagaran raba kay nag-motor...
Ang Hayahay Bar una nakong nakit-an sa usa ka hulagway dihang namalit kog orig nga CD sa bandang Enchi... Ang ilang album nga nag-ulohang "Dungagi ni bay," dinhi sa Hayahay gikuhaan ug promotion pictures...
Hayahay gyud tuod ang nahimutangan niini kay anaa man siya sa Boulevard... Nag-atubang kini sa dagat ug ang iyang duha ka andana, gidisenyo nga wala masambungi ang dakong bahin sa huyohoy sa hanging nag-gikan sa dagat...
Murag Php 500.00 man daw ang consumable nga entrance fee ani...
Ugaling, nabungkag na man ang banda nga Enchi nga mao unta ang akong tuyo pag anhi niining lugara...
Sa unahang bahin sa Boulevard makit-an kining landmark sa mga madreng St. Paul of Chartres sakay sa ilang gamay nga bangka sa ilang pag-dunggo sa Dumaguete...
Dako kaayo ug wanang ang Boulevard.. Limpyo kini... ug imong makita ang tin-aw nga tubig sa dagat... Talagsaon kaayong talan-awon ang maong lugar labina kun dako ang bulan ug klaro ang mga bitoon...
Namalik mi sa hotel, ug among gipapahuway ang gikapoy apan nalingaw nga lawas...
Pagka-ugma, misulod mi sa ilang merkado aron mamalit ug budbod...
Apan wala dinhi natapos ang among biyahe... Nangadto pa kami sa Valencia (Kini gigahinan ko ug lain nga post)...
Ang akong pagbisita sa Dumaguete karong tuiga mahinungdanon kaayo... Siya nakahatag kanako ug pipila ka oras aron makalimot ko sa akong mga problema... Ug labaw sa tanan iya kong gipahinumduman nga ang kinabuhi aduna pa diay kalipay...
Uli nami... Kun itandi sa among pagpadulong, karon nga pabalik nami, puno gyud ang "barge"...
Pipila ka mga pinulongang akong nahimamat didto:
- nabalaw nako ana = natagbaw na
- alayon ko bi = palihog ko
- baleng tsadaha = perting nindota
- kining dia = kini oh
No comments:
Post a Comment