MGA DUWA SA BATA PA AKO

MGA DUWA SA BATA PA AKO
gitagik ni Leo Carlo Casinillo

Mao kini nabantayan ko matag bakasyon

Ang uban mangitag sanga sa bayabas para himoong pangpisok nga kasing
Ni Alejo nga nabungol pagsigeg panalom ug tamala.

Ang uban adto sa ibabaw sa ka Bangkit, mangitag sanga
Himoong tirador sa mga baliala ug kurokutok sa daro sa datag.

Ang uban magsakit sa inahan aron palitan ug jolen sa tindahan ni Pitong 
Aron maka jomoy sa hagkot nga yuta duol sa puso.

Ang uban sa Lanao mamalit ug lastiko nga binugway tag singkwentas tabos
Diretso sa sementong bangko para maka dampa ug ismiker.

Ang uban mangawat ug gagmayng lawiswis magulang sa kagingking
Kawayan himoong luthang balahag sagisi aron gubat sa kalibunan.

Ang uban mosakas lubi kuhag dahon aron mamahimong bola
Sa sambunot nga sudlag bato para mabutod ang mga buko-buko.

Ang uban, manguhag bunot sa lubing gilana sa manalambal ug piang
Bakod ug singgit ug siyatong human gi-Ininsik pag ihap ang gilay on.

Ang uban manulo ug dili mangita ug hagkot nga lawa sa kamaisan ug sa mga baras-baras
Dayong kaplag sa kaka isulod sa pusporo tayhop sa kuwarto-kuwartong hinimo sa dahon sa lubing lunhaw.

Ang uban sa baybayon ug sa bungtod manguykoy ug sigay
Para binti ihikot sa lambo aron mabuak sa pandak ang langgoy nga gipatong sa Ispartan nga tsinelas.

Kining tanan abuton duol sa landahan ni Eyal Batoctoy
Diin mapuno kadtong hawanan sa mga talidhay ug sinumbagay 
Sa mga tikasan nga manuwaay nga bisan perming away,
Inig ka ugma, manag yampungad gihapon ug manag gala.