KADTONG WA PA NANGAMATAY ANG MGA GAMHANAN SA AMOA

KADTONG WA PA NANGAMATAY ANG MGA GAMHANAN SA AMOA
ni Leo Carlo D. Casinillo

Nagpaugat si nong Agdoy, dugay man mitaliwan,
Siya makugi nga mutayhop, mutalutho sa mga tingkoy
Ug mga nagbutod nga tiyan aron mahupay ang mga ugat
Makapaniudto na sa kumbira didto sa Poo nga ang
Tig hukad sa kan on ug  but-ol nagreklamo sa kalaylay
Ug pamaol niyang nahiaguman sa kakusog mangaon 
Sa mga bisita sa pista niadtong tuiga.

Si nong Aling uban sa iyang kahoy dangawanan pabiling himsog
Sa iyang pantawan, naglikit ug dalag pinulotan sa bakilid
Diin nalinding ang mga anak ni Basyat nga nangawat ug lumboy
Nga nangitom sa ka lubon ug kaaslom
Samtang siya nag kimpang-kimpang pag lugsong 
Aron pahalaron ug ugis nga manok tab ang ang mga tagtungod
sa kabatuan taliwala sa amoteng-kahoyan ni Emilio nga mamalarang.

Nagdumili usab pag pahulay si nang Pasyang,
Nga maoy nagtabang pagpahimugso kanako sa 86.
Giasoyan ako sa akong inahan nga ang mananabang nahikautot
Ug nagka-gidlay niadtong gabhiona diin ako mitiyabaw 
Sa una kong mga kasagmuyo niining mainit nga kalibutan
Gahi ug bukton, bisan pa tingali ug lat an sagol sa kapaya nga hilaw
Sa medya bol nga bahal, way ponsi-ponsi siguro gikan iyang kabaskog.

Guwatsinanggo pud ni si Juan, dili man madugta.
Basin tungod sa mga kalabera nga iyang gipangawat sa menteryo
Matag kwaresma aron isablay sa pulangki aron motuo ang mga bata
Nga siya gamhanan ug may kaalam sa paghimo ug katingalahan
Isuroy, ipanggukod sa kabataan, iyagyag gikan sa sako sa semento
Ang mga pangag nga ulo sa tawo nga may pipila ka buhok ug ugang unod
Nga mao hinuoy maka daman ug makapa-ihi namo sa banig. 

Si Kadlos, si Koba ug si Nong Anin; wala pa gyud hikaplagi sa sanggot
Nga maoy muputol sa ilang mga ugat diin nagdagayday ang gahom
Sa paghilot, samsam ug panambal ngadto sa mga inot ug matuohon.
Ang ilang mga lawas, mirisiko daw kopras sa udtong tutok
Nang ulwag ang ilang usa o duha ka ngiponng nanggungis sa kadugay.
Mga way kaligo sa kahadlok motuhop ang kabugnaw sa ilang mga panit
Nga nagputos sa pipila ka grano nga unod ibabaw sa bukog.